БИШКЕК. 2003-жылдын 11-майында Ош облусунун №30 Карасуу шайлоо округунда Жогорку Кеңештин Мыйзам чыгаруу жыйынындагы депутаттык бош орунга шайлоо өткөрүлөт. Аталган шайлоо округунун мурдагы депутаты Турсунбай Бакир уулу Мыйзам чыгаруу жыйыны тарабынан беш жылга Кыргызстандын Акыйкатчысы болуп шайланган. Ал эми 16-февралда №35 «Ош-3000» шайлоо округу боюнча Мыйзам чыгаруу жыйынына шайлоонун экинчи туру өткөрүлөт. Шайлоого Транспорт жана коммуникация министрлигинин бөлүм башчысы Мамасадык Бакиров жана Ош мамлекеттик университетинин проректору Мухтар Орозбеков катышат. Бул тууралуу бейшемби күнү Борбордук шайлоо комиссиясынан кабарлашты.
