Вашингтон Анкарага АКШ аскерлерин Ирактагы ыктымал согуш учурунда Түркияда жайгаштыруу жөнүндөгү макулдашуунун долбоорун сунуш кылды. Түркиянын вице-премьер-министри Абдуллатиф Сенер бирок, АКШ азырынча Түркиянын Ирактагы согуштан тартчу чыгымдарын кайтаруу тууралуу Анкаранын талаптарын канааттандыра электигин айтат. АКШнын Анкарадагы элчиси Роберт Пеарсон Түркия менен сүйлөшүүлөр татаалдашып баратканын маалымдады: "Өзүмдүн жана АКШ президентинин атынан биз үчүн убакыт өтө кымбат болуп жатканын айттым. Вашингтон менен Анкара азыр мунасага келүү жолдорун издеп жатат, жакын арада бир чечимге келебиз деп ишенем", - дейт АКШнын Түркиядагы элчиси. Анкарадан келген кабарларга караганда, АКШ Ирактагы ыктымал согушка көрсөтчү көмөгү үчүн Түркияга 6 млрд долларлык жардам жана 20 млрд долларлык насыя сунуш кылган. Түрк өкмөтү жардамдын көлөмүн 30 млрд доллардан ашырууну талап кылууда.
Анкарада Ирактагы ыктымал согуш учурунда АКШ аскерлерин Түркияда жайгаштыруу боюнча сүйлөшүүлөр өтүп жатат