БИШКЕК. Бүгүн Бишкекке иш сапары менен Евразия Экономикалык Шериктештигинин баш катчысы Григорий Рапота келип, аны президент Аскар Акаев кабыл алды. Жолугушууда Евразия Экономикалык Шериктештиктин кеңешинин 27-апрелде Дүйшөмбү шаарында боло турган кезектеги отурумунун күн тартибиндеги маселелер талкууланды. Негизинен гидроэнергетика ресурстарын чогу пайдалануу, Шериктештиктин аймагындагы транспорт, байланыш тармактарын өнүктүрүү боюнча көп тараптуу кызматташуу маселелери көңүл борборунда болду. Президент А. Акаев уюмдун интеграциялоо жараянындагы артыкчылыктуу багыттарды колдой турганын билдирди.
