Женева шаарында өтүп жаткан Бириккен Улуттардын Адам укуктары боюнча комиссиясынын сессиясында Ирактагы абал талкууланып, өлкөнүн экологиясы өтө оор абалга кабылды деп айтылды. Ирактын шаар-кыштактарын таза суу менен камсыздоо, канализация системасын калыбына келтирүү жана калдыктарды жок кылуу иштери тез арада башталышы абзел. Андан тышкары, америкалык аскерлер уран кошулган курал да колдонгон жана анын кесепеттери да бааланууга тийиш, карапайым калкка болсо анын зыянынан кантип чет болуш керектиги тууралуу малымат берилиши керек.
