Саддам Хусейндин режими кулады, терроризмдин колдоочулары жөнүндөгү америкалык мыйзамды мындан ары Иракка каршы колдонуунун зарылдыгы жок. Кошмо Штаттардын мамлекеттик катчысы Колин Пауэлл ушундай аныктама кабыл алууну Вашингтон администрациясына сунуш кылды. Мындай аныктама Багдад менен соода-сатык кылууну жана ага жардам көрсөтүүнү жеңилдетет. Ак үйдүн өкүлү Ари Флейшер мындан 12 жыл мурда Иракка каршы киргизилген санкциялардын алынышын президент Буш колдой тургандыгын ырастады.
