БИШКЕК. Бүгүн Эл өкүлдөр жыйыны президентке Апас Жумагуловду Малайзияга, Уркалый Исаевди Улуу Британияга элчи кылып дайындоого макулдук берди. Макулдук берүү Конституциянын жаңы редакциясынын жоболоруна ылайык ишке ашты. Ушул эле күнү палата кыргыз өкмөтү менен Ислам Өнүктүрүү Банкынын ортосунда түзүлгөн келишимди ратификациялады. Бул келишимге ылайык, банк Суусамыр-Талас-Тараз жолун оңдоого 9 млн. 150 миң доллар насыя бөлөт. Транспорт жана байланыш министринин орун басары Кубанычбек Мамеевдин маалыматы боюнча, өкмөт бул жолдон тышкары Ош-Сарыташ жолун оңдоого кредит алуу максатында Азия Өнүктүрүү Банкы менен сүйлөшүүлөрдү жүргүзүүдө.
