Линктер

бейшемби, 8-декабрь, 2016 Бишкек убактысы 22:35

11-АВГУСТТАН ТАРТЫП ЭЛЕКТР ЖАРЫГЫ ӨЧҮРҮЛӨ БАШТАЙТ


Сапар Орозбаков, Бишкек Электр энергиясын өндүргөн “Электр станциялары” акционердик коому 11-августтан тартып энергия бөлүштүрүүчү компанияларга электр энергиясын берүүнү чектей тургандыгын жарыя кылды. Алар бул акцияны бөлүштүрүүчү компаниялардагы карыздарын өндүрүү үчүн жасамакчы.

“Электр станциялары” акционердик коомунан алынган маалыматка караганда бул акция 11–августта өлкөнүн Ош жана Баткен областарын тейлеген “Ошэлектр” энергия бөлүштүрүүчү компаниясынан башталат.

- Анткени бизге “Ошэлектр” төлөбөй жатат. Электр энергия үчүн ал бизге 470 млн. сом карыз. Бере турган каражаттын болгону 6% акча түрүндө төлөйт,- деди “Электр станциялары” акционердик коомунун сатып өткөрүү бөлүмүнүн башчысы Светлана Ефименко. Анын айтымында, аталган акционердик коомго 4 бөлүштүрүүчү компания биригип 1 млрд 631 млн. сом карыз.

Эгер башка компаниялар карыздарын жойбосо, мындай акция аларга карата да жасалат. Светлана Ефименко акча төлөбөгөн электр пайлалануучулардын энергиясын кесип салуу тууралуу көрсөтмө өйдө жактан болгонун белгилейт. Чынында эле мындан 10 күндөй мурда коопсуздук кеңештин чечимине байланыштуу өкмөт жыйыны болуп, анда премьер-министр Николай Танаев электр энергия акысын төлөбөгөндөргө каршы аеосуз күрөш жүргүзүү тууралуу айткан болчу. Бирок ал төлөгөндөргө тийбей, төлөбөгөндөрдүн гана электр зымы кыркыла тургандыгын билдирген. “Электр станциялары” акционердик коому “биз бөлүштүрүү компаниялар канча төлөбөсө, ошончо көлөмдө бербей коебуз, кимди өчүрүп, кимди калтырарын алар өздөрү билишсин” дейт.

“Ошэлектр” энергия бөлүштүрүүчү компаниясына кайрылганыбызда анын жетекчиси Курманбек Укулов “Электр станциялары” акционердик коомунан андай каттын келгенин ырастады. Анын айтымында, ошондой эле кат “Улуттук электр тармак” акционердик коомунан да келген. “Улуттук электр тармактын” жетекчиси Бакирдин Сартказиев чектөө 25-августтан башталарын билдирген. “Ошэлектрдин” баш директору Курманбек Укуловдун айтуусу боюнча, эки ишкананын ортосундагы келишим боюнча “Электр станциялары” акционердик коомунун мындай чектөө киргизүүгө акысы бар. Бирок төлөбөгөндөр өчүрүлүп, төлөгөндөр калат деген бекер сөз.

- Эгерде 100 мегаватт берип жатсак, 30 мегаватын беребиз, 70 мегаватын бербейбиз деп жатышат. Ошол 30 мегаватын төлөгөндөргө жеткирип, төлөбөгөндөргө бербегиле деп айтып жатышат. Теория боюнча ошондой кылса болот. Практика жүзүндө ал мүмкүн эмес. Менде 320 миң абонент болсо, анын 20 миңи төлөп, 300 миңи төлөбөсө, анын баарын бир күндө өчүрүп чыгышым керек. Мен анын ар бирин бир күндө столбадан кыркып чыга албайм да, - дейт Курманбек Укулов.

Анын айтымында, компания «Электр станциялары» жана «Улуттук электр тармак» акционердик коомуна биригип 1 млрд сомдой бересе. Бирок анын элде ошондой эле аласасы бар. Эл болсо акчасы жогунан төлөй албай жатат. 11-августка чейин төлөбөгөңдөрдүн электр өткөргүчтөрүн кыркып салуу техникалык жактан да мүмкүн эмес.

- Өчүрүү иштерин жасаган адамдар биздин штатта каралган эмес. Бир монтер бир күндө 10 абонентти өчүрүшү мүмкүн. 300 миң абонентти өчүрүш үчүн 30 миң адамдан турган армия кармашым керек. Менин техникалык персоналым 1 миңдин тегерегинде эле. Бул практикалык жактан мүмкүн эмес кадам, - деди Курманбек Укулов.

Ошентип жакында убагында акча төлөп жаткан пайдалануучулар да электр энергиясыз калат. Алардын жазыгы-төлөбөгөн адамдар менен бир айылда жашап калганы.
XS
SM
MD
LG