Орусиянын Ыраакы Чыгыш чөлкөмүндө эки күн мурун вертолетто учуп чыгып, ошол бойдон дайынсыз жоголгон 20га жакын адамды издөө иштери улантылууда. Сахалин облусунун башчысы Игорь Фархутдинов баш болгон жүргүнчүлөр арасында акимчиликтин кызматкерлери, тикучманы башкарган 4 кишиден турган экипаж да бар. Тикучма жоголгон аймакта Орусиянын өзгөчө кырдаалдар министрлигинин 7 вертолету, атайын учак жана 250дөй куткаруучулар иштеп жатышат. Эң соңку маалыматтар боюнча, аймактагы катаал аба ырай шарттарынан улам, кырсыкка кабылгандарды издөө иштери жума күнү убактылуу токтотулду.
