Линктер

жума, 9-декабрь, 2016 Бишкек убактысы 06:26

Сапар Орозбаков, Бишкек Бишкекке келген Эларалык валюта корунун кезектеги миссиясы өз ишин аяктап, 27-августта журналисттер үчүн пресс-конференция өткөрдү. Миссия жакырчылык кыскартуу жана экономикалык өнүгүүгө өбөлгө түзүү деп аталган 3 жылдык программа өлкөдө ийгиликтүү аткарылып жатат деп эсептейт. Болгону бюджет тартыштыгы программада коюлган чектен бир аз ашып кеткен.

Эларалык валюта корунун миссия жетекчиси Тапио Саавалайнен журналисттерге билдиришинче миссия программада белгиленген иш-чаралар канаатандырарлык аткарылып жатат деген пикирде:

- Программада коюлган көпчүлүк параметрлер аткарылды. Бир гана бюджеттин тартыштыгы боюнча прогрмманын аткарылышы аксап жатат. Бирок бул көрсөткүч анчалык деле көп бузулган жок. Биз экинчи жарым жылдыктын перспективасын изилдеп көрдүк. Анын негизинде биз мурдагыдай эле программаны толук аткарса болот деп эсептейбиз. Бирок ал аткарууга оор.

Саавалайнен шейшемби күнү өкмөт мүчөлөрү менен жолукканда айтканына караганда, бюджеттин тартыштыгы программада коюлган чектен 440 млн. сомго өсүп кеткен. Бирок бул көрсөткүч боюнча так маалымат жок. Ал бул айырманы 400-500 млн. сом деп болжол менен айтты. Өкмөттүн өзүнүн эсеби боюнча, ал 1 млрд 171 млн сомду түзөт. Тапио Саавалайнен пресс-конференцияда миссия Бишкекке келген алгачкы күндөрү аны1 млрд сомдон ашык деп эсептеп, тактагандан кийин суманы 400-500 млн. сомго түшүргөнүн белгиледи.

Пресс-конференцияда миссия өкмөттүн дарегине катуу сын айткан жок. Тапио Саавалайнен өлкөдө баары жакшы эле болуп жаткандай түр көрсөттү.

- Бюджеттин тартыштыгын программанын параметрлерине тууралаш үчүн айрым чыгымдарды азайтууга туура келет. Мисалы, капиталдык салымдарды, эксплуатация жана ремонтко бйланыштуу чыгымдарды, мамлекеттик инвестицияны азайтса болот.

Миссиянын өкмөт мүчөлөрү менен сүйлөшүүсү оор болду. Премьер-министр миссия даярдаган докладды түпөйүл кабыл алып, Тапио Саавалайнен менен кер-мур айтышканга чейин барды. Николай Танаев докладдын бюджеттин тартыштыгы өсүп кетти деген жерин көрсөтүп мындай деди:

- Ушул сүйлөмдүн негизинде мен айрым жетекчилердин кызмат ордуна туура келиши тууралуу чечим кабыл алышым керек.

«Жакырчылыкты кыскартуу жана экономикалык өнүгүүгө өбөлгө түзүү» 3 жылдык программасынын аткарылышы кыргыз өкмөтү үчүн өтө маанилүү. Анткени анын жыйынтыгына жараша Париж клубу Кыргызстандын тышкы карызын кечүү тууралуу чечим кабыл алат. Программа 2001-жылдын октябрында кабыл алынган болчу. Быйыл анын 2-жылы жүрүп жатат. Буга чейин программа ийгиликтүү аткарылып келе жаткан. Өкмөт бул жылды да жакшы аяктоону көздөп, анда белгиленген иш-чараларды толугу менен аткарууга аракет кылып келет. Быйыл бюджеттин тартыштыгы боюнча проблеманын чыгышы негизинен табигий кырсыкка байланыштуу. Жер көчкүнүн кесепетинен үйсүз калгандарга жардам берүү максатында өкмөт бюджеттен мурда каралбаган акча бөлүүгө аргасыз болду. Программанын экинчи жылы сентябрь айында бүтөт. Октябрь айында миссия дагы бир жолу келип, программанын жыйынтыгын биротоло чыгарат жана 3-жылга иш-чараларды өкмөт менен макулдашат.
XS
SM
MD
LG