Линктер

logo-print
шейшемби, 6-декабрь, 2016 Бишкек убактысы 02:38

БҮГҮН БИШКЕКТЕ «МЕНИН ӨЛКӨМ» ПАРТИЯСЫНЫН ЖЫЙЫНЫ БОЛОТ


Жыргалбек Касаболотов, Бишкек Бүгүн кечке жуук башкалаадагы Тарых музейинде «Менин өлкөм» саясий партиясынын түзүлгөндүгүнүн 5 жылдыгына байланыштуу салтанаттуу пленум болот.

Бул туурасында партиянын уюштуруу иштери боюнча координатору Галина Куликова мындайча маалымдады:

- Эртең бизде бир жагынан кезектеги, экинчи жагынан салтанаттуу пленум болуп, ал партиябыздын түзүлгөндүгүнүн 5 жылдыгына арналат. Туура 5 жыл мурда, 25 октябрда, Көздүн микрохирургиясы боюнча ооруканада 52 делегат чогулуп, «Менин өлкөм» аттуу аракетчил партиянын түзүлгөнүн жарыялашкан. Пленумга өлкөбүздүн бардык региондорунан 230дай делегат келет.

Жакында «Менин өлкөм» партиясы 2005-жылдагы президенттик шайлоого өз талапкерин көрсөтө тургандыгын жарыялаган. Бирок партиянын өкүлү биз менен болгон маегинде талапкерлердин атын айтууга азыр эртелик кылаарын билдирди.

- Эртең биз, «Менин өлкөм» партиясы катышмайынча бир дагы шайлоо өтпөй тургандыгын айтабыз. Ал эми конкреттүү талапкерлердин аты-жөнүн биз шайлоо өнөктүгү жакындаганда гана ачыкка чыгарабыз, - деди Галина Куликова.

«Менин өлкөм» – борборчул партиялардын бири. Партияны алгач айтылуу дарыгер Алмазбек Исманкулов жетектеп келсе, кийин анын эки тизгин, бир чылбыры азыркы вице-премьер-министр Жоомарт Оторбаевге өткөн. Айрым адистердин айтуусуна караганда, анын талапкерлиги 2005-жылдагы президенттик шайлоодо көрсөтүлүшү мүмкүн.
XS
SM
MD
LG