Линктер

logo-print
жекшемби, 04-декабрь, 2016 Бишкек убактысы 16:40

ЭЛ АРАЛЫК ВАЛЮТА ФОНДУ: «КЫРГЫЗ ӨКМӨТҮ МЕНЕН ПРОГРАММАНЫН 3-ЖЫЛЫ ТУУРАЛУУ МАКУЛДАШУУГА ЖЕТИШТИК»


Сапар Орозбаков, Бишкек 6-ноябрда Эл аралык Валюта Фондунун (ЭВФ) кезектеги миссиясы өз ишин аяктады. Миссия буга байланыштуу басма сөз жыйынын өткөрүп, ЭВФ каржылап жаткан «Жакырчылыкты азайтуу жана экономикалык өнүгүүгө өбөлгө түзүү» аттуу программанын 3-жылына коюлчу милдеттерди кыргыз өкмөтү менен макулдашканын билдирди.

Эмдиги 2004-жыл - программанын акыркы жылы. Анын аткарылышына жараша Париж клубу Кыргызстандын 350 миллион долларга жакын тышкы карызын кечүү тууралуу чечим кабыл алат. Ошондуктан кыргыз өкмөтү жана аны колдогон ЭВФ кийинки жылга коюлчу милдеттер реалдуу жана колдон келгидей болушун каалашат. Ошол себептен алар программада коюлчу контролдук көрсөткүчтөрдү кылдат карап чыгышты. Буга миссия өкмөт башчысы менен 3 жолугушуу өткөргөнү күбө болот. Миссиянын жетекчиси Тапио Саавалайнендин айтымында, кыргыз өкмөтү менен ЭВФ тиешелүү меморандумга 6-ноябрда кол коюшту.

Миссиянын жетекчиси Тапио Саавалайнен:
- Бүгүн биз акыркы жолугушуу өткөрдүк жана ЭВФтин «Жакырчылыкты азайтуу жана экономикалык өсүшкө өбөлгө түзүү» программасынын 3-жылы тууралуу макулдашууга жетиштик.

Ал өз сөзүндө эмдиги жылы апрель айында бюджеттик чөйрөдө иштегендердин айлыгы 15% көтөрүлөөрүн, кийин, октябрда, эгерде тиешелүү булактар табылса, дагы 15% көтөрүлөөрүн белгиледи. Пенсия болсо, апрель айында орто эсеп менен 9% жогорулайт. Тапио Саавалайнендин айтуусу боюнча, келерки жылы инфляция 4% ашпоого тийиш. Ал эми ички дүң продуктунун өсүшү боюнча тапшырма быйылкыга салыштырмалуу азыраак берилет.

Тапио Саавалайнен:
- Келерки жылы алтын казуунун азайышы күтүлөт. Бирок эл чарбасынын башка тармактарында 4,5-6% деңгээлинде өсүш болот деп жатабыз. Бул, ички дүң продуктунун реалдуу өсүш темпи бир аз басаңдайт дегенди билдирет. Ал биздин божомол боюнча 4,1% түзөт.

Программанын экинчи жылы жөнүндө болсо, миссия ал ийгиликтүү аяктаганын билдирди. Бюджеттин тартыштыгынан башка көрсөткүчтөрдүн бардыгы аткарылган. Бюджеттин тартыштыгы болсо 500 млн. сом айырма болуп чыгып жатат. Миссия өкмөт акыркы эки айдын ичинде бюджеттин чыгымдарын азайтып, бул көрсөткүч боюнча да программаны аткараарына ишенет.

Тапио Саавалайнен журналисттерге Кыргызстандын ЭВФтеги өкүлү Зруппе мырзаны тааныштырды. Зруппе мырза өз сөзүндө программаны аткаруудагы кыргыз өкмөтүнүн аракетин жогору баалады.

Зруппе мырза:
- Мага өзгөчө таасир берген нерсе – кыргыз тараптын бул программага өз программасындай мамиле кылганы болду. Үлгү болорлуктай деп айтса болот. «Мындай программаны өлкөлөр ЭВФтин үстөмдүгү менен ишке ашырат» деп айтып калышат. Мен кыргыз өкмөтү менен талкууларга катышып, «программанын өлкөгө пайдалуу экенин түшүнгөн үчүн кыргыз тарап ага ошондой мамиле кылат» деген ойго келдим.
XS
SM
MD
LG