БИШКЕК. Бириккен Араб Эмираттарынын абактарында 100гө жакын кыргызстандык аялдар камалып отурат. Ал аялдардын баары сойкулук боюнча айыпталып кармалган жана аларды Кыргызстанга кайтаруу максатында иштер жүргүзүлүп жатат. Бул туурасында бүгүн «Кабар» маалымат агенттигинде өткөрүлгөн басма сөз жыйынында ички иштер министринин орун басары Болотбек Ногойбаев билдирди. Анын айтымында, Ички иштер министрлигинин кызматкерлери Бириккен Араб Эмираттарына кыргызстандык кыз-келиндерди ар кандай жолдор менен жиберген кыргызстандык адамдарды кармап, аларга каршы кылмыш ишин козгоду.
