Линктер

шейшемби, 6-декабрь, 2016 Бишкек убактысы 22:10

БИШКЕКТЕ КВАРТИРАЛАР ЖЫЛЫБАЙ ЖАТАТ


Сапар Орозбаков, Бишкек Шейшембиде Энергетика боюнча мамлекеттик агенттиктин, «Кыргызгаз» акционердик коомунун жана Бишкек шаарынын жетекчилери Өкмөт үйүндө пресс-конференция өткөрүшүп, кышка даярдык жана квартираларга жылуулук берүүнүн абалы тууралуу маалымат беришти. Бишкек шаарынын вице-мэри Эмилбек Абдыкадыров борбор калаанын квартираларына Бишкек жылуулук борбору (Бишкек ТЭЦи) тарабынан жылуулук жетишсиз берилип жаткандыгын кабарлады.

«Газ болбой, быйыл кышта эл кыйналат» деп айтып жүргөн депутат Тайырбек Сарпашевдин сөзү чын болуп чыкчудай.

- Биздин керектөөчүлөр, Бишкек жылуулук борборунан чыккандагы эсеп менен, жок дегенде, 70-75 градус жылуулук алыш керек болсо, бүгүнкү күнү ал 56 градус болуп жатат. Бул - нормадан бир кыйла төмөн, - деди Бишкек шаарынын вице-мэри Эмилбек Абдыкадыров.

Ал бул үчүн «Электр станциялар» акционердик коомун күнөөлөдү. Анын айтымында жылуулуктун берилишине жараша анын акысы да төмөндөтүлүүгө тийиш. Шаар башчынын орун басары бишкектиктерди өздөрүнүн квартираларына берилип жаткан жылуулуктуу ченөөгө жана аны күбөлөндүрүп акты түзүүгө чакырды. Пресс-конференцияда айтылгандарга караганда, жылуулуктун кубатсыз берилип жатышы кышка даярдалган отун-суунун жетишсиздигине байланыштуу.

- Алар жөн эле үнөмдөп жатышат.Азыр анчалык деле суук эмес. Жетишпеген отундун ордун үнөмдөп жатышат. Алар мэриядан же энергокомпаниядан акча болбой калабы деп сактанып жатышса керек, - деди Энергетика боюнча агенттиктин директорунун орун басары Акылбек Түмөнбаев.

Анын айтымында, азыр Бишкек жылуулук борборунда 363 миң тонна көмүр бар. Бул керектөөнүн 60% түзөт. Жетпеген көмүрдү Казакстан берерин эске алганда, Бишкек шаарындагы жылуулуктун жетишсиздиги газга гана байланыштуу деген тыянак чыгарса болот. Бирок газ азырынча үзгүлтүксүз берилип жатат. Бир гана жери 1-январдан кийин эмне болору белгисиз. Анткени Кыргызстан Өзбекстан менен газ боюнча келишимге эмгиче кол коё элек. «Кыргызгаздын» баш директорунун орун басары Кубанычбек Жусуповдун айтымында, анын жетекчиси Автандил Сыдыков ушул күндөрү «Узтрансгазды» келишим түзүүгө көндүрөм деп Ташкентте жүрөт.

- Бирок, өзбек тарап олуттуу талап коюп жатат. Берип жаткан жаратылыш газы үчүн акыны толугу менен валюта түрундө төлөөнү талап кылууда, - деди Кубанычбек Жусупов.

Өзбекстан мурда акынын бир бөлүгүн товар түрундө алып жүргөн. Азыр гана «валюта менен төлөгүлө» деп жатышат. «Маселе ушунда болуп жатат» деп түшүндүрдү Кубанычбек Жусупов келишимдин жоктугун. Бирок анын айтымында «Кыргызгаздын» «Узтрансгазга» төлөгөнгө 5 млн. долларлык гана товары бар. Ал эми карыздын жалпы суммасы 10,6 млн доллар. Шейшемби күнү сүйлөшүүлөр аяктап, келишимге кол коюлушу керек болчу. Бирок, Кубанычбек Жусупов сүйлөшүүнүн ийгиликтүү бүтөөрүнө ишенбейт.

- Биз сүлөшүүлөрдү 2 айдан бери жүргүзуп жатабыз. Мен бул жолу да ийгиликтүү бүтпөйт деп ойлойм, - деди Кубанычбек Жусупов. Ошого карабай, ал «өлкө жаңы жылдан кийин да газсыз калбайт» деп ишендирди. Анткени, Өзбекстан газды токтотуп салса да газ келе берчү булак бар.
- Ошондой болуп кетсе да, газ ала беребиз. Биз газдын келиши токтобой турган жолун табабыз, - деди Кубанычбек Жусупов. Анын айтымында, «Кыргызгаздын» резерви бар. Бирок ал резервдин канча экенин, канчага жетерин «азыр айткым келбейт» деди..
XS
SM
MD
LG