КАРАКОЛ. «Тамчы» эл аралык аба майданынын кубаттуулугун арттыруу боюнча каражат табылып, аны реконструкциялоо иштерин баскыч-баскыч менен бүткөрүүнүн мөөнөтү такталды. Ага ылайык быйыл жумуштун бир бөлүгү бүтөт. Ушул тапта аталган аба майданынын жетекчилиги эл аралык авиа компаниялар менен сүйлөшүүлөрдү жүргүзүп, Ысыккөлдө Орусия, Европа жана Борбордук Азия мамлекеттери менен аба жол катнашты чыңдоо маселелери такталууда. Айрыкча Орусиянын коммерциялык субьекттери «Тамчы» аба майданынын реконструкцияланышына кызыкдар.
