БИШКЕК. Ооганстан Кыргызстандан курулуш материалдарын жана электр энергиясын сатып алууга кызыкдар. Мындай пикирин Ооганстандын өткөөл өкмөтүнүн башчысы Хамид Карзай Ташкенде Кыргызстандын президенти Аскар Акаев менен жолугушууда билдирген. Карзайдын айтымында, Кыргызстандын электр энергиясын Ооганстан өлкө ичинде эле пайдаланбастан, Пакистан өңдүү кошуна мамлекеттерге жеткирүүгө да даяр. Кыргызстандын электр энергиясын сатып алуу маселесин Карзай буга чейин Дүйнөлүк Банктын жетекчилиги менен да талкуулаган.
