БАТКЕН. Облустук акимчиликтен 28-июлда алынган маалыматка караганда, Тажикстандын Исфара районундагы Матфари айылында жашаган улутташтарыбыз бул кайрылуусунда жашоо-шарттын кыйындыгынан колунда барлардын көпчүлүгү Баткендин чектеш айылдарына көчүп кетишип, көчүп кетүүгө мүмкүнчүлүгү жоктор гана калышканын, алар негизинен Баткен облусунун аймагындагы базарлардан айыл-чарба азыктарын ташып соода-сатык менен шугулданарын белгилешкен. Ошондой эле акыркы убакта ары-бери каттоодо, соода-сатык иштерин жүргүзүүдө чек ара, бажы жана салык кызматкерлеринен ыдык көрүшүп, мыйзамсыз аракеттерге тушугуп жатышанын айтышып, облус бийлигинен бул маселени жөнгө салууну өтүнүшкөн.
