Нью-Йорк шаарында жайгашкан "Хюман райтс вотч" аттуу адам укуктарын коргогон уюмдун айтымында, Ирактын бийликтен кулатылган президенти Саддам Хусейндин жардамчыларынын үстүнөн жакын арада сот башталса, ал адилет болбой калышы мүмкүн, анткени тергөө учурунда көптөгөн кемчилик кеткен. Ирак жетекчилеринин айтымында болсо, Саддамдын жакын жардамчыларынын бири Али Хасан ал-Мажидке каршы сот эмки аптада, эң кеч дегенде январдын орто ченинде башталууга тийиш. Кечээ күнү болсо Саддам өзү дагы алгачкы жолу адвокаттар менен жолукту.
