Франция президенти Жак Ширак бүгүн Париж шаарында Экинчи дүйнөлүк согуш учурунда кырылган жөөттөргө арналган эстелик ачты, анда согуш учурунда Францияда өлтүрүлгөн 76 миң жөөттүн ысымдары жазылган. Берлин шаарында дагы канцлер Герхард Шрөдер согуш учурунда кырылган алты миллион жөөттү эскерип сөз сүйлөдү. Кечээ күнү Нью-Йорк шаарындагы Бириккен Улуттардын баш кеңсесинде Освенцим өлүм лагеринин бошотулганынын 60 жылдыгына арналган атайын жыйын болгон.
