Линктер

logo-print
дүйшөмбү, 05-декабрь, 2016 Бишкек убактысы 06:25

Кыргызстандагы парламент шайлоонун жүрүшүнө КМШ өлкөлөрүнөн 195 өкүл байкоо жүргүздү. Байкоочулар миссиясынын жетекчиси В.Рушайло шайлоо жыйынтыгы тууралуу бүтүм чыгаруу эртелик кыларын айтып, Кыргызстан сындуу билимдүү өлкөдө шайлоочулардын баш бармагына белги коюу орунсуз экендигин белгиледи.

Күнкорсуз мамлекеттер шериктештигине кирген өлкөлөрдүн байкоочулар миссиясынын бүтүмү көбүнесе ырасмий бийликтин позициясына үндөш чыгып калары кыйладан бери айтылып келатат.

Грузиядагы парламенттик, Украинадагы президенттик шайлоонун алгачкы жыйынтыктары тууралуу КМШ өлкөлөрүнүн байкоочулар миссиясынын көңүлток бүтүмү чындыктан атчабым алыс экенин «гүлдүү ыңкылаптардын» жүрүшү көрсөткөн.

Күнкорсуз мамлекеттер шериктештигинин аткаруу комитетинин жетекчиси Владимир Рушайло алдагыдай ажырымдыкты эки уюмга кирген өлкөлөрдөн келген байкоочулардын иш усулуна байланыштуу түшүндүрдү. Тажикстанга сапар алардын алдында Бишкекте Европа коопсуздук жана кызматташуу уюмунун байкоочулар миссия жетекчиси менен жолугушуп, аны менен байкоо жүргүзүүнүн усулу жайында да пикир алышарын билдирди:

- Тажикстанга жөнөөр алдында ЕККУдан келген кесиптештерибиз менен жолугушуу белгиленген. Анда биз байкоолорубузду ортого салып, кийинки жылдары КМШ өлкөлөрүндө такай өткөрүп келаткан байкоо жүргүзүү усулдарыбыз жайында сүйлөшөбүз.

В.Рушайло парламент шайлоого мурдагы элчилердин талапкер катары катыштырылбай калышы мыйзамдык алешемдик экенин белгилеп, муну КМШ өлкөлөрүнүн байкоочулар миссиясы жыйынтык бүтүмүндө атайын белгилей тургандыгын маалымдады.

- Бул маселени да биз азыр иликтеп жатабыз. Аны жыйынтык билдирүүбүздө чагылдырабыз. Менин оюмча, бул өзү ойлоно турган маселе. Мыйзамчылар мындай чектөөнү койбош керек эле. Дагы айтсак, мурдагы элчилер саны жагынан деле аз экен. Алардын шайлоого катышуусу жалпы ишке анчалык деле таасир тийгизмек эмес.

КМШ өлкөлөрүнүн байкоочулар миссиясынын жетекчиси Кыргызстандагы парламент шайлоонун алгачкы жыйынтыктары чыкканча ал тууралуу ачык бүтүм чыгаруу эртелик кыларын айтты. «Шайлоо жыйынтыгын күтө туралы» деди В.Рушайло.

- Бармакка белги коюу жаңылыгы элге деле анча жакпайт, участкалык шайлоо комиссиялары деле ага сүйүнүшкөнүн баамдай албадык. Белгини Ооганстан, Иран сындуу өлкөлөрдө колдонушат. Калкынын баары сабаттуу, улуттук салты бийик, маданий деңгээли жогору элге белги коюу анча ылайыксыз. Айыл жериндеги динди бекем кармаган адамдар арасында да бармак белгиге ишенбегендер бар. Муну биз сөзсүз белгилейбиз,- деп айтты В.Рушайло.

Европа копсуздук жана кызматташуу уюмунун байкоочулар миссиясынын өкүлү Фабио Марино добуш берүү мыйзамдык негизде өтүп жатканын белгиледи:

- Шайлоо өнөктүгү эл аралык стандарт талабына ылайык өттүбү же өтпөдүбү деген суроого мен так жооп бере албайм. Кечээ БШК төрагасы экс-элчилердин шайлоого катыштырылбашы мыйзам чегинде болгонун, Кочкор жана башка жерлерде талапкерлер сот тарабынан шайлоо атаандаштыгынан четтетилгенин маалымдады. Менин оюмча, шайлоого катыша турган кишилер абыдан чоң күнөөсү үчүн гана атаандаштыктан четтетилиши мүмкүн. Андан башка талапкерге тоскоолдук болбош керек,- дейт Фабио Марино.

КМШ жана ЕККУ өлкөлөрүнөн келген байкоочулардын шайлоо тууралуу билдирүүлөрү добуш берүүнүн алгачкы жыйынтыктары чыккандан кийин белгилүү болот.
XS
SM
MD
LG