Линктер

жума, 9-декабрь, 2016 Бишкек убактысы 00:17

НАРЫНДА АЙРЫМ ТАЛАПКЕРЛЕР АКЧАНЫН КҮЧҮНӨ САЛЫШТЫ


Нарында шайлоо мыйзам бузуулар менен өттү. Мындай маалыматты айрым талапкерлер да, шайлоочулар да айтып жатышат. Мурдагы саясий өнөктүктөгүдөй эле арак, акча таратуу, элди шайлоо участокторуна машина менен ташып келүү болду.

Нарын шаарынын тургуну Чынара Акбаева төрт шайлоо участогуна баргандан кийин гана өзүн тизмеден араң тапкан. Бишкектен айрым маалыматтар боюнча 150дөн ашык маршруттук таксилер шайлоочуларды алып келип, кайра жеткиришти дешет айрым байкоочулар. № 33 Нарын шайлоо аймагына кирген Каракужурда жашаган 149 шайлоочуга көчмө үкөк барган эмес.

Улан деп өзүн тааныштырган жигит шаардын бир шайлоо участогунда комиссиянын мүчөсү анын алдындагы эки шайлоочуну бармактагы белгини көрүп туруп эле өткөрүп жибергенин айтат.

«Демократия жана жарандык коом үчүн» коалициясынын Нарындагы өкүлчүлүгү билдиргендей № 40, 73 шайлоо участокторунда эки шайлоочунун ордуна башка адамдар добуш берип кетишкени айкын болгон.

Коалициянын төрт байкоочусу № 35 Жумгал, Акталаа шайлоо аймагындагы Миңкуш жана Кабак шайлоо участокторунда жолго көчкү түшкөндүгүнөн жетпей калышкан.

Ал эми №32 Атбашы шайлоо аймагынын Дөбөлүү айылына кырк бюллетень жетпей калган. Анын себеби Бишкектен шайлоочу студенттер келишкен. №34 Кочкор шайлоо аймагында да мыйзам бузуулар болуп жатат деп билдирди «Эр айдоочу» бейөкмөт уюмунун жетекчиси Качкын Булатов:

- №34 шайлоо округунда көз карандысыз байкоочу катары биздин 120 киши байкоо жүргүзүп атат. Ошондой эле Жумгал районундагы Кызарт айылында мектептин директору Кубанычбек Шаршеналиев мектептердин класстарын ачып коюп, үгүт жүргүзүп жаткан экен. "Кой" десек да болбой койду.

Качкын Булатов кепти минтип улантты:

- Экинчи Солтонбеков атындагы мектептин директору ошол эле Усубалиевдин өкүлү экен. Аты-жөнүн атпай койду. Усубалиевдин китебин алып, үгүт жүргүзүп атат. "Силер эмне мындай мыйзам бузууларды кылып жатасыңар?" десек, "биз мыйзамды бузган жокпуз. Токтотпойбуз, бөлмөлөргө киргизе беребиз" деп айтышты. Биз ал үчүн акт түздүк дагы эртең сотко беребиз деп билдирдик. Үйбүлөөлүк дарыгерлердин башкы доктуру Жумаева Баян бүгүн дагы арак таратып, Усубалиевге үгүт жүргүзүп атат. Ушундай эле Кыдыралиев мектебинин директору үгүт насыяттарын жүргүзүп атат. Кызарт айылынан, аты-жөнүн такыр атпай койду. Райондук администрациянын орун басары да үгүт жүргүзүп жүрүптүр. Кочкордо дагы акимдин орун басары, обладминистрациядан да кишилер тымызын үгүт иштерин жүргүзүп жаткан фактылар бар.
"Десанттар" келип коркутуп, үйлөрүнө чейин баргандар болуп жатат, бул иш токтотулабы билбейбиз. Эми жыйынтыкты күтүүдөбүз.
XS
SM
MD
LG