Линктер

бейшемби, 8-декабрь, 2016 Бишкек убактысы 10:22

ӨЗБЕК ЧЕГАРАЧЫЛАРЫ КАРМАП КЕТКЕН ОШТУК ЖУРНАЛИСТ БОШОТУЛДУ


Кубанычбек Жолдошев, Ош Кыргыз-өзбек чегиндеги “Достук” чегара бекетинен Өзбекстандын чегарачылары тарабынан кармалып кеткен кыргызстандык журналист Эркин Якубжанов жакында бошотулду. Ал баш-аягы Өзбекстандын тергөө абагында 11 күн бою кармалды. Журналист Эркин Якубжанов кармалышынын себептери жана ал жакта кандай шартта болгону туурасында кабарчыбызга маек курду.

- Эркин мырза, Өзбекстандын чегарачылары сизди эмне үчүн кармап кетишти?

- 18-июль күнү кечки саат алтылар чамасында кыргыз-өзбек чегарасынан өтүп жаткан чагымда Өзбекстандын чегарачылары кармады. Паспортумду көрсөткөндөн кийин менин рюкзагымда эмне барына кызыгышып, көрүп, токтотуп кармап калышты.

- Тергөө абагындагы сурак учурунда кандай суроолор болду?

- Сурак учурунда кайда иштээримди, эмне максат менен Өзбекстан тарапка өтүп жатканымды сурашты. “Азаттык” радиосунда иштейсиңби, иштебейсиңби?- дешти. Мен аларга ачык, жок мен “Азаттыкта” иштебейм деп жооп бердим.

- Жекече буюмдарыңызды тинтүү учурунда Анжиян окуяларын иликтөөгө байланышкан журналисттик материалдар табылган деген маалыматтын канчалык деңгээлде чындыгы бар?

- Анжиян маселеси туурасындагы топтогон анча-мынча маалыматтарым бар эле. Аны көрүшүп, эмне үчүн топтоп атасың, кандай максаттарың бар, объективдүү бересиңби, кимдер берген интервьюларды, информацияларды?-деген суроолор болду.

- Баш-аягы ал жакта канча убакыт болдуңуз жана сизге карата күч органдарынын мамилеси кандай болду?

- Мен Өзбекстандын аймагында 11 күн болдум. Анын 3 күнүн “Достук” бажы пунктунда, 8 күнүн Анжиян облусунун коопсуздук кызматынын абагында өткөрдүм. Мага кылган мамилелери жакшы эле болду, эч бир күч колдонгон жок мага карата.

- Бошотулушуңузга түздөн-түз кимдер себепкер болду деп ойлойсуз?

- Бошогонума эң биринчиден Кыргызстандын тышкы иштер министрлигинин өкүлүнүн барышы себеп болду болуш керек. Анан дагы бул жердеги эң чоң ролду журналисттер ойноду деп ойлойм.

- Ушундай окуядан кийин журналисттик ишиңизди улантуу ниетиңиз барбы?

- Албетте, алектенем деп ойлойм. Азыр көз карандысыз журналист катары иштерди жүргүзүп, мурдагы калып кеткен макалаларымды жазып жатам.
XS
SM
MD
LG