Жергиликтүү ММКга колдоо көрсөтүү боюнча баш кеңсеси АКШда жайгашкан «Интерньюс» уюмунун эки кызматкерин сот күнөөлүү деп таап, бирок мунапыс жөнүндөгү жардыкка такап, сот залынан бошотту. Уюм эки аял кызматкерге каршы козголгон ишти саясий куугунтук катары баалады. «Интерньюстун» Ташкендеги эсепчиси жана мурдагы директору тийиштүү лицензия албай туруп иш жүргүзгөнү жана символдорду мыйзамсыз пайдаланганы үчүн күнөөлүү деп табылды. Уюмдун Борбор Азия боюнча директору Жош Макледер сот өзбек бийликтеринин «Интерньюсту» өлкөдөн кетирүү заказы боюнча иштеди деп эсептейт.
