БИШКЕК. Кыргызстан өзбекстандык качкындар маселесин эң туура чечти, андай болбогондо өлкөнү азыркы бийлик оор жагдайларга алып келмек. Мындай пикирин Тышкы иштер министринин милдетин аткаруучу Роза Отунбаева “Азаттыкка” берген маегинде билдирди. Министрдин айтымында, учурда Кыргызстан бийлиги Өзбекстан менен газ маселесин чечүүгө аракет жасап жатат. 2005-2006-жылдар үчүн түзүлгөн газ боюнча келишимди өзбек тарап бир жактуу токтотуп койгон. Айрым байкоочулар муну качкындар маселеси менен байланыштырып жатышат.
