Компартия Борбордук комитетинин төрт күнгө созулуучу жыйынында делегаттар өлкөнүн келерки беш жылга өнүгүү планын жактырары күтүлүүдө. План 2006-2010-жылдарды камтыйт. Мамлекеттик "Синьхуа" жаңылыктар агенттигинин кабарлаганына караганда, Кытай компартиясы жаңы планда өнүккөн өлкөлөрдүн моделине жакындаган стратегияны кабыл алууну көздөөдө. Башкача айтканда, экономикалык өсүш арзан жумушчу күчү менен табыгый байлыктарга эмес, технологиянын жетишкендиктерине негизделиш керек. Кытайда соңку жылдары жөнгө салынбаган өсүштөн улам айлана-чөйрөнүн деградациясы өлкөнүн кээ бир аймактарында олуттуу проблемага айланды.
