Линктер

шаршемби, 7-декабрь, 2016 Бишкек убактысы 16:58

ОРУСИЯДА УЛУТЧУЛ БОЛЬШЕВИКТИК ПАРТИЯСЫНЫН АКТИВИСТТЕРИ КЕСИЛДИ


Муса Мураталиев, Маскөө калаасы Орусия баш калаасында Твер райондук соту бейшембиде 39 «лимоновчулар» үстүнөн чыгарган өкүмдү буздуруу үчүн алардын адвокаттары андан ары доо арыздарын жөнөтүштү. Былтыр декабр айында Орусия президенти администрациясынын жарандарды кабылдачу кенсесин «лимоновчулар» ээлеп алып нааразылык акциясын өткөргөн. Ошондо кармалган Улутчул большевиктик партиясынын активистери үстүнөн сот өкүмү эми чыгарылды. Аларга «массалуу түрдө баш аламандык чыгарышкан» деген кине коюлду. Сегизи бир жарым жылдан үч жарым жылга дейре кесилди. Калганы шарттуу түрдө кесилип бошотулду. Кармалгандар бир жыл бою камакта жатышкан жана жогору жактарга арыздануу эч натыйжа берген эмес.

Улутчул большевиктик партиясынын 39 жаатташтарын бирге камап тургудай кең зал жалгыз Твер райондук сотунун имаратынан табылып, ошол себептүү аларды бейшемби күнү ошол жерде соттошту. Отуз бир «лимоновчу» шарттуу түрдө эркинен ажыратылып бошотулган жана сегизи бир жарым жылдан үч жарым жылга дейре абакка кесилген. Алардын чогуу жазаган иши «массалуу түрдө баш аламандык чыгаруу» деп таанылган. Былтыр декабрде улутчулдар президенттик администрация имаратынын бирин ээлеп алып, бийликке каршы «Конституцияны тебелеп тепсебегиле!» деп ураан көтөрүп, акция жүргүзгөн. Жарым сатка жетпеген убактын ичинде аларды күч органдары кызматкерлери кармап, ошондон бери суракта жатышкан. Кремлдик бийлик кенсебизге бүлүк салган деген кине менен алардан бул убак ичинде 143 миң рубл же 5 миң доллар өндүрүп алган. «Лимоновчулар» өздөрүнүн кармалышын саясий максатта болду деп, өздөрүнө коюлган күнөөнү моюнга албай, четке кагышууда.

Улутчул большевик партиясынын отуз тогуз мүчөсүнүн соттолушу орусиялык коомчулукта ар кыл пикир жаратууда. Бийлик тараптагылар эгерде муну башкаларга сабак болгудай катуу жазалабаса, анда «ким көрүнгөн каалаган имаратты басып алып өз талабын коюу адаты пайда болот» деп аларды көп жылдарга кесүүнү талап кылууда. Бүгүн, 9 декабрде БиБиСиге берген жообунда «Бирдиктүү Орусия» партиясынын Маскөө бөлүгүнүн лидери Андрей Метельский «түстүү ыңкылаптар» дал ушундай майда иштерден башталарын айткан:

«Билесизби, буга окшогон жарандык баш бербөө канча жолу болгонун билесизби? Кыргызстанда, Грузияда жана башка жактарда өттү. Анын акыры эмнеге алып келгени баарыга маалым», - деген Метельский.

Улутчул большевиктер партиясы аталышта жаатты уюштурган жазуучу Лимонов кечөө биздин кабарчы менен болгон аңгемелешүүсүндө: «Орусия – зордукчу өлкө мамлекети», - деп айткан.

Кеткен айда «лимоновчулар» кенсе кылган Лобня көчөсүндөгү үйдү милиция ачып кирип тинтүү жасаган. Метронун «Беляево» станциясына жакын жерде дагы бир «лимоновчулар» кенсе кылган квартираны 7- ноябрде бийлик күч менен жаптырган. Кашир шоссесинде «Башкы жол» гезитинин редакциясын 24-ноябрде тинтип, акыры аны да жаптырышкан.

Бул Орусиялык Жогорку сот жакында Улутчул большевиктик партиясынын ишмердүүлүгүн карап чыгып, аны такыр жабуу чечимин чыгаргандан кийин болуп аткан иш. Ошол эле учурда декабрдин башында өткөн Москва Думасын шайлоого байланыштуу Кремл өлкөдө улутчулдук маанайды арттыруу кадамын жасагандыгын жана ал маанай менен саны жагынан аздык кылган мусулмандар, Кавказдан чыккандар менен иммигранттарды кысымга алуу болгонун», маселен, Фигаро жазды. Аналитиктердин кай бирлери «анын катарында ачык мансап талашып аткан улутчул большевиктик партия ишкердиги бейкоркунуч эле», - дешет. Дагы бирөөлөр: «Алар кадимки эле ээнбаштар, алар өздөрүн саясий маанайда тепки жеп, бийликтен кордук көргөн кылып көргөзүшүүдө», - деп да айтышууда.
XS
SM
MD
LG