Грузияда Михаил Саакашвили кийинки жылдын 5-январына белгиленген президенттик шайлоого катышып жаткандыгына байланыштуу кызматынан чегинди. Анын басма сөз катчысы Вано Нониашвили кызматтан кетүү жөн гана формалдуулук деп билдирди. Өлкөнүн баш мыйзамы боюнча шайлоо өткөнгө чейин өлкөнү парламенттин спикери Нино Баржанадзе башкарат. Анын аралыгында, оппозициянын он миңден ашуун тарапкелери кечээ парламенттин алдында митинг өткөрүп, Имеди сыналгысынын кайра ачылышын талап кылды. Ушул айда полиция оппозициянын митингин күч менен таратып, айрым көз карандысыз сыналгылардын ишин токтоткон болчу.
