Линктер

жекшемби, 11-декабрь, 2016 Бишкек убактысы 06:50

Аким Өзгөн, Стамбул Мурдагы аптада Бакуда болуп өткөн Түрк тилдүү элдердин жана жамааттардын курултайы тууралуу Түркиялык басма сөздөрдөгү талкуулар уланууда. Turkish Daily News гезитинин кечееки санында ири макала жарыяланып, анда Бакуда эки күнгө созулган курултай учурунда Түрк тилдүү элдер Европа Биримдигинин үлгүсүндө “Түрк Биримдигинин Парламентин” түзүү тууралуу мунасага жетишишкени айтылат. Гезитте жазылгандай, бул тууралуу маалыматты берген Түркиянын башкаруудагы АК партиянын депутаты Алааттин Бүйүккая, “дүйнөдө бардык өлкөлөр араб лигасы, африканын бирдиктүүлүгү өңдүү алянстарды же топторду түзүп келишет. Биз курабыз деп жаткан биримдик өз ара тарыхый, маданий жана экономикалык мамилелерди өнүктүрүү максатын көздөйт”,- деген.

Лондондо чыгуучу Jane's Intelligence Digest жумалыгынын соңку санында жарыяланган бир макалада, Ислам Каримовдун Өзбекстанда кайрадан президенттике талапкер болуусунун тегерегинде ой жүгүртүлгөн. Өлкөсүнүн башмыйзамын тоотпой, Каримовдун кайрадан талапкер болушу эч кимди таң калтырбаганы билдирилген макалада Орто Азиянын энергетика булактары тууралуу чоң дөөлөттөтөрдүн ортосундагы таймаш жана ал таймаштагы Өзбекстан ойной турган борбордук рол жөнүндө айрым ой жорууларга орун берилип, 2005-жылда Кыргызстанда элдин нааразычылык толкундарынын натыйжасында орун алган “Жоогазын ыңкылабынан” кийин бул өлкөдө туруктуулук бүгүнгө чейин орнобой, өлкөдө хаостук кырдаалдын өкүм сүрүп жатканы; а Түркменистанда Сапармурад Ниязовдун кайтыш болуусунан кийин бийликтин сыпайы түрдө алмашуусу жана жаңы президенттин кыска аралыктын ичинде бардык кошуналары менен татынакай мамилелерди түзүшү, көптөгөн адамдарга сабак болгондугу бышыкталат.

Казакстандын борбордук банкы өлкөнүн экономикасынын, АКШдагы ипотека кризисинен башат алган накталай акча таңсыктыгынан аман эсен чыга алышын камсыздоо максатында 4 миллиард $ жыйган. Бул тууралуу борбордук банктын мүдүрү Анвар Саиденов Лондондо чыгуучу Financial Times гезитинин кабарчысына айтып берген. Гезитте жазылышына ылайык, жыйналган фондунун 1 миллиард доллардык бөлүгү быйыл, өкмөт белгилей турган ылдый пайыз менен өлкөдөгү соода банктарына карызга берилмекчи.
XS
SM
MD
LG