Пакистанда кол салуудан курман болгон оппозиция лидери Беназир Бхуттонун сөөгү анын мекени Синдх провинциясына жеткирилди. Кечээ Бхутто Равалпинди шаарындагы митинг маалында жарылган бомбадан жарадар болуп, кийинчирээк ооруканада көз жумду. Жанкечти жардырган бомбадан бери дегенде 20 адам набыт болду. Бхуттонун өлүмү тууралуу кабар өлкөдө массалык тополоңдорду тутандырды. Өлкө башчысы Первез Мушарраф улуттук сыналгы аркылуу Пакистан элин сабырдуулукка чакырды. Өлкөдө үч күнгө аза күтүү ырасмысы жарыяланды.
