ЖК төрагасынын орун басары Азизбек Турсунбаев менен эсеп палатасынын төрагасы Искендер Гаипкулов кечээ маалымат таратып, Ататүрк багындагы аларга бөлүштүрүлгөн жерди пайдалануудан баш тарткандыгын билдиришти. Маалыматта айтылгандай алар парламенттин мурдагы курамында депутат болуп турган учурунда шаардык бийликтен турак-жай тургузуу үчүн жер сурап кайрылышкан. “Мэрия биздин өтүнүчүбүздү көпкө карап, аягында 7 сотых жер берилгени тууралуу маалымдама берген. Бирок биз жерди өзүбүзгө жаздырууга жана аны иштетүүгө жетишкен эмеспиз,” деп белгилешкен билдирүү ээлери Ататүрк багынан жер алып, турак-жай тургузуп жатышкан башкаларды да андан баш тартууга чакырышкан.(ZKo)
