Линктер

logo-print
ишемби, 03-декабрь, 2016 Бишкек убактысы 02:18

Бир катар саясатчылар жана адистер өлкө катаал азык-түлүк кризисинин алдында турганын айтып, коңгуроо кага башташты. Жогорку Кеңештин депутаты Кабай Карабеков да атайын маалымат жыйын куруп, өкмөт бул жаата чабал иштеп жатканын, айдап-себүү --> http://rfe.azattyk.org/rubrics/economics/ky/2008/02/8C7CC633-A793-49F3-B469-5EA6052F9EF1.asp иштерине делген күйүүчү майлар ушул кезге чейин кечигип жатканын жарыялады. Анын айтымында, өкмөт азык-түлүк коопсуздугуна 40 пайызга гана даяр болгондуктан, баалардын мындан ары дагы өсүшү күтүлөт. Ал эми Мамлекеттик сатып алуулар жана материалдык резервдер боюнча мамлекеттик агенттиктин директору Пайзуллабек Рахманов болсо учурда күйүүчү майлар жетиштүү экендигин, анын кечиккенине айрым объективдүү себептер болгонун билдирди.

Соңку күндөрү жазгы айдап-себүү иштери айрым региондордо соңуна чыгып, айрым жерлерде кызып турганына карабай мамлекет тарабынан аймактарга жетирилет делген күйүүчү майлар дагы деле болсо келбей жатканы, мамлекеттик тиешелүү органдардын иштебей жатканы айтыла баштаган. Парламент депутаты Кабай Карабеков да өкмөттүн бул жаатагы иши көңүл жылытпай жатканын айтып, чукул арада антикризистик программа иштелип чыкпаса абал оорлой берерин баса белгиледи:

- Парламент жыл башында бюджетти бекитип атып, болгон каражатты өкмөткө бөлүп берген. Айыл-чарба министрлигине, мамлекеттик резервдер агенттигине, бардыгына. Күйүүчү майлар үчүн мамлекеттик резервдер агенттигине 205 миллион сом, буудай алганга 400 миллион бөлдүк, жер семирткичтерге 30 миллион, элиталык урукка 20 миллион, “Айыл банкка” 100 миллион бөлдүк дыйкандарга кредит үчүн. Жаңы тракторлорго 200 миллион бөлүп бердик. Бирок бүгүн тиешелүү өкмөттүк органдар 40 пайыз гана даяр. Мисалы, дизелдик күйүүчү майлар жер-жерлерге жетпей атат.

Мамлекеттик сатып алуулар жана материалдык резервдер боюнча мамлекеттик агенттиги болсо учурда жазгы талаа иштери үчүн делген күйүүчү майлар толугу менен Кыргызстанга келгенин, учурда алар арзандатылган баада жер-жерлерге жеткирилип жатканын билдирүүдө. Күйүүчү майларды тартып келүү боюнча өкмөт жарыялаган тендерди жеңип алган “Кыргыз - Руснефтехим” ишканасынын өкүлү Шекербек Кошоевдин айтымында, келишимде көрсөтүлгөн 10 миң тонна дизелдик күйүүчү май убагында алып келинди:

- Мен күйүүчү майларды тартып келүү иштерин кечиктирдик деп айтпас элем. Анткени, ошол тартып келүүнүн жалпы мөөнөтү ошончого созулат.

Мамлекеттик сатып алуулар жана материалдык резервдер боюнча мамлекеттик агенттигинин директору Пайзуллабек Рахмановдун ырасташынча, келишим түзүлгөндөн кийин күйүүчү майдын баасы кескин көтөрүлүп кеткенинен улам, аны тартып келүүчү ишкана милдетинен баш тартып, акыры сүйлөшүүлөрдөн кийин гана 120 миллион сом зыян тартканына карабай келишимдеги баада күйүүчү майларды тартып келген.

Ошондой эле ал жакынкы арада ун кымбаттабай турганын, былтыркыдай кескин түрдө нандын кымбаттап кетишине жол берилбесин баса белгиледи:

- Эгер былтыр ундун баасы кымбаттап кеткенде 37 миң тонна ун элге арзандатылып берилген болсо, биз бүгүн 60 миң тонна ошонтип жеткиргенге даярбыз. Бирок мен айтып коюшум керек, жакынкы арада ун кымбаттабайт. Былтыркыдай баалар кескин өспөйт, ага жол бербейбиз.

Ошентсе да айрым экономисттер баалар бир көтөрүлүп алгандан кийин түшпөй турганын, мындан ары да азык-түлүккө болгон баалар кымбаттай берерин айтышууда. Мындай кептерден улам Айыл, суу чарба жана кайра иштетүү өнөр жай министрлиги оперативдүү маалымат таратып, айдап-себүү иштерине 40 миң тонна күйүүчү май талап кылынарын, ал эми Материалдык резервдер боюнча агенттик алдырып келген 10 миң тонна күйүүчү май жалпы керектелүүчү майдын үчтөн бирине зорго жетерин, андыктан элдин кыйласы күйүүчү майды кымбатыраак сатып алганга мажбур болорун билдирди.
XS
SM
MD
LG