Ош облустук соту Ош шаардык сотунун Бириккен Улуттар Уюмунун мандаттуу качкыны, кыргызстандык адвокат Саидкамол Ахмедовду бир жылдык сынак мөөнөтү менен шарттуу түрдө 3 жылга кесип, 5 миң сом айыпка жыккан өкүмүн күчүндө калтырды. Бул туурасында Ахмедовдун жактоочусу Таир Асанов «Азаттыкка» 11-апрелде кабарлап, «Бириккен Улуттар Уюмунун мандаттуу качкынын соттомой дүйнөлүк практикада болгон эмес. Бүгүнкү өкүм Кыргызстандын эл аралык аброюна дагы бир ирет көлөкө түшүрдү» деп кошумчалады. Ал эми Ош шаардык прокуратурасынан Саидкамол Ахмедовдун айыбы соттук териштирүүлөрдүн жүрүшүндө толук аныкталгандыгын, бирок жазасы жеңилирээк болуп калгандыгын билдиришти.
