Линктер

шейшемби, 6-декабрь, 2016 Бишкек убактысы 22:23

Быйыл борбор калаабызга 130 жыл толду. Мааракеге карата Бишкек шаардык маданият башкармалыгы бир топ маданий иш-чараларды пландаштырган. Алардын бири борбордогу Исхак Разаковдун үй музейинде ачылган “Пишпек-Фрунзе-Бишкек” көргөзмөсү.

Көргөзмөдө эски Пишпек шаарынын көркү, андан соң Фрунзе болуп аты өзгөргөндөн кийинки көрүнүшү, ошол кездеги тургундардын жашоо-шартынан кабар берген сүрөттөр, ошондой эле учурдагы Бишкек шаары, борбор калаадагы имараттарды чагылдырган эмгектер коюлган.

Борбордогу мемориалдык музейлердин жетекчиси Арман Момаханованын айтуусунда, бул материалдарды мамлекеттик архивден, китепканалардан алышкан. Көргөзмөнүн көрүүчүлөрү ошондой эле борбор калаага келип отурукташкан башка улуттардын колдонгон буюмдарын да көрө алышат. Бул буюмдар тууралуу Разаковдун үй музейинин башчысы Гулзат Касымова баяндайт:

-Калаага келип отурукташкан башка улуттун өкүлдөрү көбүнчө жерди иштеттүү менен алектенишкен. Ошондо колдонгон кетмен, керки деген чарбачылык буюмдарын койдук. Мындан сырткары эң биринчи келген орус калкы тигүүчү машиналарды, самоор жана башка буюмдарды ала келишкен.



Ошондой эле үйгө кооздук катары коюлган буюмдар бар. Ал эми буюмдарды коллекционерлерден, Бишкектин айрым тургундарынан табышкан. Көргөзмөнүн айрым көрүүчүлөрүнө бул иш-чара жакшы таасирлерди калтырды. Өзгөчө улуу муундагы адамдар жаш кездерин эске салганын айтышты. Алардын катарында Бишкек шаарынын тургуну Айгүл Жумалиева да ой бөлүштү.

-Илгерки Фрунзе болуп турган кезин чагылдырган сүрөттөр жана башка буюмдар коюлган экен. Жакшы уюштурулуптур. Өзүбүз дагы союз учурундагы кишилерден болгондуктан көзүбүзгө жакшы көрүнүп жатат.

Бишкек шаарынын 130 жылдык мааракесине карата шаардык маданият башкармалыгы бир топ маданий иш-чараларды пландаштырган. Буга чейин жаш таланттардын фестивалын, курамы ардагерлерден турган чыгармачыл топтордун арасында сынактар уюштурулду. Алдыда болсо жогорку окуу жайларынын студенттеринин катышуусунда “Студенттик жаз” фестивалы өтөөрү күтүлүүдө.

Айжан Шаботоева, Бишкек
XS
SM
MD
LG