Линктер

logo-print
ишемби, 03-декабрь, 2016 Бишкек убактысы 06:35

Кинорежиссер Темир Бирназаровдун “Белгисиз багыт” кинотасмасы тартылып бүтүп, Бишкекте бетачары өткөнү турат. Темир Бирназаровдун “Белгисиз багыт” кинотасмасында – белгисиз бир тарапка кетип бараткан айылдык автобустун ар түрдүү жүргүнчүлөрүнүн өз ара сүйлөшүп кетип баратышы менен, Кыргызстанда учурда болуп жаткан ар кандай маселелер козголот.

Автобусту да демократиялык заманга ылайык, айыл эли акча чогултуп өздөрү сатып алышкан. Жүргүнчүлөрдүн арасында – коммунист, демократ, соодагер, молдо, ырчы, ишкер дагы башка кесип ээлери бар.

Кыргыз Эл артисти Дүйшөн Байтөбөтов Темир Бирназаровдун “Белгисиз багыт” кинотасмасында айылдык автобустун айдоочусу болуп ойногон:

-Ооба, мен бул тасмада айдоочунун ролун ойнодум. Ал бүгүнкү заманга ыңгайлашкан, “делегой” адам... Жолкире баасын да өзү каалагандай тез-тез көтөрүп турат. Адам көңүлүнөн акчаны жогору коет.

Темир Бирназаров өзү сценарийин жазган бул кинотасманы тартуудагы башкы максатына токтолду:

-Биз бул тасманы жаратуу менен бүгүнкү күндө Кыргызстанда түзүлүп жаткан социалдык-экономикалык жана руханий проблемаларды алып чыгууну көздөдүк.

Темир Бирназаровдун “Белгисиз багыт” кинотасмасына артисттер – Акылбек Мураталиев, Күмөндөр Абылов, Бакыт Мукул жана башкалар тартылышкан. Тасмада айдоочунун ролун ойногон Дүйшөн Байтөбөтов фильмдин идеясын мындайча түшүндүрдү:

-Кетип бараткан жүргүнчүлөрдүн баарынын тилеги - жакшылык. Келечекке чоң үмүт артып баратышат. Чынында жалпы Кыргызстан бүгүн эртеңге үмүттүү карап турбайбы...

Темир Бирназаровдун “Белгисиз багыт” кинотасмасынын бетачары келаткан аптада “Алатоо” кинотеатрында, кийинчерээк “Манас” кинотеатрында өтмөкчү. Ал эми кийинки учурда кыргыз тасмаларынын аймактарга чыгышы мүмкүн деле болбой калды деди кинорежиссер Темир Бирназаров:

-Облустардагы, райондордогу кинотеатрлар негизинен жабылган. Ал жайлар жетекчиликтерге иштеп, ижараларда турушат. Мына ушундай жаңы тасмаларды элге кантип жеткирүүнү биз да ойлонуп, чечалбай отурабыз.
XS
SM
MD
LG