14-июлда түнкү саат үчтөр чамасында Талас шаарынын Ломоносов көчөсүндөгү шаардык автоинспекциянын имаратынан өрт чыгып, өрт өчүрүүчүлөрдүн аракетине карабастан толук күйүп кеткен. Талас облустук өрт өчүрүүчү бөлүм жетекчиси Эмил Мейманалиев азыр комиссия иштеп, өрттүн себептери такталып жатат деп, “Азаттыкка” бул тууралуу кененирээк маалымат берүүдөн баш тартты. Талас шаардык ички иштер бөлүмүнүн жетекчиси Кадыр Жаркыналиев имараттын ичиндеги алтымышка жакын айдоочулардын күбөлүктөрү кошо күйүп кеткенин айтып, алар кайрадан шаардык МАИ кызматкерлери тарабынан калыбына келтирилерин билдирди. (UA)
