Линктер

logo-print
жекшемби, 04-декабрь, 2016 Бишкек убактысы 18:54

1-ИЮЛЬ: ТАРЫХ БАРАКТАРЫ


Фрунзе шаардык партиялык активдин 1943-жылдын 1-июлунда Өкмөт үйүндө өткөрүлгөн жыйында жаш жеткинчектерге коммунисттик тарбия берүү маселеси талкууланды. «Кыргызалтын» трестине караштуу «Кумбел» жана «Мелик суу» кендери 1944-жылдын 1-июлунда стратегиялык баалуу кендин өндүрүшүн белгиленген нормадан жогору аткарган.

Айтылуу композиторлор В. Фере менен П. Шубин жетектеген Кыргыз филармониясынын Кырым жана Кавказ курортторуна жасаган концерттик кыдыруусу 1939-жылдын 1-июлунда соңуна чыкты. Кыргызстандык искусство чеберлери курорттук мекемелерден тышкаары эмгекчилер коллективдеринде да концерт беришип, мындагы адамдарды кыргыз аспаптык өнөрүнүн жетишкендиктери менен тааныштырышкан.

Фрунзе шаардык партиялык активдин жыйыны 1943-жылдын 1-июлунда Өкмөт үйүндө өткөрүлдү. Партиялык актив жаш жеткинчектер арасындагы коммунисттик тарбиянын жетишсиз жүргүзүлүп жатышын кескин сынга алды. Айрыкча, балалуу партия мүчөлөрүнө жеткинчектер балдарын каникул маалында бош койбой колхоз талаасына чыгарып, дыйкандарга жардамдашуусу керек экендиги эскертилди. Балдарын коруп, бакчаларга чыгарбаган коммунист ата-энелерге партиялык жазалар көрүлө тургандыгы белгиленген.

«Кыргызалтын» трестине караштуу «Кумбел» жана «Мелик суу» кендери 1944-жылдын 1-июлунда стратегиялык баалуу кендин өндүрүшүн белгиленген нормадан жогору аткарган. Айрыкча, пландан ашыкча өндүрүлгөн 7 тонна вольфрам Кызыл Армиянын Башкы командачылыгынын фондуна берилип, ал Улуу жеңиштин баалуу кошумчасы катары бааланган.

Фрунзе шаарынын ишкана жана мекемелери 1957-жылдын бул күндөрү коммунисттик партиянын тазалыгы туурасындагы маселени талкуулашты. Партиялык актив «Маленков, Молотов, Каганович жана аларга кыпчылган Шепиловдун коммунисттердин катарын бөлүп-жарууга жасаган аракетин» айыптаган. Завод жана фабрикалардын эмгекчилери аталган жолдоштор Хрущевду кызматтан алуу амалын көздөгөндүгүн белгилешип, коммунисттик партиянын катарын чыңдоо зарылчылыгын күн тартибине коюшкан.

Шаардыктар арасында «Фрунзелик Черемушка» аталган мурдагы Ярослав, азыркы Ахунбаев атындагы көчөдөсүндө 1964-жылдын 1-июль күнү стоматологиялык поликлиника ачылган. Стоматологиялык поликлиника ошол кездеги медициналык техниканын жетишкендигине ылайык жабдылып, стоматологиялык бардык жардамды көрсөтө алган. Мындан улам жаңы поликлиника Кыргыз мамлекеттик медициналык институттун стоматологиялык факультетинин базасы катары таанылган.
XS
SM
MD
LG