Линктер

logo-print
жекшемби, 04-декабрь, 2016 Бишкек убактысы 14:08

Бүгүн саат 15:00дө Гапар Айтиев атындагы көркөм сүрөт музейинде жаш сүрөткерлердин “Айтматов” көргөзмөсү ачылат. Көргөзмөгө мыкты деп табылган 40 эмгек коюлду жана көргөзмөнүн ачылышына Чыңгыз Айтматовдун жубайы Мария Урматова, уулу Элдар катышмакчы.

Кыргыз Эл жазуучусу Чыңгыз Айтматовдун 80 жылдык мааракесинин урматына уюштурулуп жаткан көргөзмө-сынакка Кыргызстандын бардык аймактарынан жаш таланттар эмгектерин жөнөтүшүп, бүгүн мамлекеттик музейде саат 3тө ачылып жаткан көргөзмөгө 40ка жакын жаш сүрөтчүнүн 100дөн ашык эмгеги коюлуп жатат.

Көргөзмөгө коюлуп жаткан эмгектер тууралуу кыргыз Эл сүрөтчүсү, мамлекеттик музейдин директору Юристанбек Шыгаев мындай оюн айтты:

- Көргөзмөгө жаш таланттарыбыздын Айтматовдун өзүнүн элесин түшүргөн жана Айтматовдун чыгармаларынын каармандарын, чыгармалардагы окуяларды чагылдырган эмгектери коюлуп жатат. Көргөзмөгө эмгектери коюлуп жаткандардын көпчүлүгү – Сүрөтчүлөр союзунун алдындагы жаш сүрөтчүлөр экен. Улуу сүрөткердин урматына ачылып жаткан көргөзмө - чынында чоң майрам. Көргөзмөгө Чыңгыз Айтматовдун жубайы Мария Урматова жана уулу Элдар катышмакчы. Элдар да сүрөтчүлүк кесипти аркалап жүрөт. Ал Бельгиядагы Сүрөтчүлүк окуу жайын аяктаган.

Айтматовго арналган сүрөт эмгектердин көргөзмөсү республикалык Жаштар иштери боюнча Департаменттин демилгеси менен өтүп жатат. Жаштар иштери боюнча Департаменттин уюштуруучусу Бермет Кеңешова көргөзмөгө келип түшкөн эмгектерге токтолду:

- Сынакка Кыргызстандын аймактарынан 14 жаштан 25 жашка чейинки жаш сүрөтчүлөрдүн эмгектери келип түштү. Айтматовдун чыгармаларына байланышкан абдан кызыктуу, ойлондурарлык, ар кандай жанрдагы сүрөттөр. Көрөрмандарыбызга да кызыктуу болот го деген ойдомун.

Ушул күндөрдө коңшулаш өлкөлөрдө да өтүп жаткан Чыңгыз Айтматов темасындагы көргөзмө-Сынак алдыда дагы уланып, сынак КМШ мамлекеттеринин жаш сүрөтчүлөрүн да камтып, сынактын финалдык жыйынтыгы октябрь айында КМШ мамлекеттеринин саммитинде чыкмакчы.

Республикалык жаштар иштери боюнча Департаменттин директору Айдар Жоробеков сыйлыктар жана жалпы эле Көргөзмөгө келип түшкөн эмгектер туурасында буларды айтты:

- Сынакка келип түшкөн эмгектер боюнча атайын калыстар тобу түзүлгөн. Бүгүнкү көргөзмө-сынактан өткөндөр күздө өтчү КМШ мамлекеттеринин жаш сүрөткерлери катышкан сынакка катышат. Жеңүүчүлөр акчалай сыйлыктар менен сыйланышат.
XS
SM
MD
LG