Эл аралык Олимпиадалык Комитет менен Кытай бийликтери олимпиадалык оюндардын убагында Интернетти эркин пайдаланганга расмий Бээжиндин тоскоолдук кылып жатканы үчүн оюндарды чагылдырууга келген миңдеген журналисттердин сынына кабылууда. Кытай бийликтери өлкөнүн улуттук кызыкчылыгына жат саясат жүргүзгөн сайттарга кирүүгө болбойт деп чектөө киргизишкен. 8-августта Бээжин Олимпиадасынын салтанаттуу ачылыш аземи болмокчу. Ага Кыргызстандын президенти Курманбек Бакиев да катышаары күтүлүүдө. Кыргызстандык 20 спортчу бул оюндарга катышып, медалдар үчүн күч сынашмакчы.
