Ипотекалык рыноктогу кризистен улам бир нече миллиард доллар жоготуп, баалуу кагаздарынын куну кеткен Lehman Brothers банкы дүйшөмбүдө банкротко кептелгенин жарыялаган соң Азия менен Европада, АКШнын өзүндө биржалык индекстер кургуйга кулап, баалуу кагаздардын наркы арзандады. Орусиянын баалуу кагаздар базарында индекстер 12-18 пайызга түшүп, кечээ биржалык соодалар токтотулган. Лондон, Париж жана Франкфуртта дагы акциялар кескин арзандаганы кабарланууда.
