Линктер

logo-print
жекшемби, 04-декабрь, 2016 Бишкек убактысы 16:47

Ингушетияда ишемби күнү Малгобек районуна караштуу Сагопхи кыштагында «Балтика» азык-түлүк дүкөнүнyн ичинде жардыруу болгон. Жабыр тарткан киши болгон эмес. ИНТЕРФАКС жазганга караганда ал таңга жуук, саат 3-55 мүнөт өткөндө болгон. Арадан алты сааттай өтпөй Малгобек шаарынын Этуш көчөсүндөгү ФСБ бөлүмүнүн имаратынын алдында кызматкердин машинеси жарылып, анда да эч ким жабыркаган эмес. Ошол эле күнү күндүзгү саат 13 тө Назрандын Барсукинский районуна караштуу көрүстөндө жардыруу болгон. Кечки саат 18 ченде Орджоникидзе кыштагынын Ленин көчөсүндөгү прокуратуралык имараттын жанына токтогон милиция кызматкеринин машинеси жарылып, ичиндеги милиция кызматкери ошол жерде жан берген. Анализчилер Ингушетияда мындай көрүнүштүн көндүм болуп баратканын айтышат.

Машинелердин бири Малгобек шаарындагы Коопсуздук федералдык кызматынын (ФСБ) райондук башкармасынын алдында жардырылган. Ошондон улам сырттан көз салуучулар Ингушетияда кийинки учурда тартип сактоо органдарынын кызматкерлерине кол салуу күн сайын болуучу болду дешет. Натыйжада, буга окшогон көмүскөдөгү кармашта Ингушетия президенти Мурат Зязиковдун тууганы Бекхан Зязиковду атып кетишкен. 31-августта бийликке оппозициядагы «Ингушетия.ру» сайтын түзгөн Магомед Евлоевду да көз көрүнөө атып салышты дешет.

6-октябрде ИНТЕРФАКС жазганга караганда, Орусиянын Түштүк ферералдык округунун прокуратурасынын алдындагы башкы иликтөө башкармасынын өкүлү Магомед Евлоевге ок жаңылып өлгөн деген. Ал күнү оппозициялык сайттын ээси Маскөөдөн келип Назрандагы учак майданында тепкичтен түшүп келатканда аны жоон топ милиция кызматкерлери кармап кетишкен. Биртикеден кийин анын чыкыйына ок тийип ооруканага жеткирилди деген кабар таркаган. Анан түнгө жетпей сөөгү үй-бүлөсүнө чыгарылып берилген.

Ошол сырдуу өлүмгө Маскөөлүк эксперттердин азыр чыгарган бүтүмү: «Евлоевдин башына ок жаңылыптыр» деген аныктама болгон.

Азыр баш калкалап четте жүргөн Ingushetiya.ru сайтынын баш редактору Роза Мальсагова айтканга карагнда, Евлоевди бийлик алдын ала мелжеп туруп аттырып салды. Ал үчүн Ингушетиянын президенти Мурат Зязиков жооптуу деген.

30-сентябрде «Эхо Москвы» аркылуу Ингушетиянын мурдагы президенти Руслан Аушев өз жумуриятындагы жагдайды «тымызын жүрүп аткан жарандык согушка окшойт» деген.

Андай жагдай азыр жалпы эле Түндүк Кавказга мүнөздүү экенин саясий талдоочу Муса Садаев айтат. Анын себеби Түндүк Кавказдагы жумурияттарда Кремль дайындаган жетекчилердин эл менен иши жок болушунда дейт. Алар артында орусиялык 2 миллиондон кем эмес аскер турбаганда орундарында бир да күн калыша алмак эмес. Эмне дегенде алар эл менен кантип сүйлөшүүнү билишпейт дейт «Азаттыкка» айткан оюнда Садаев мырза:

«Орусияда эл эмнени каалайт деп, ага кызыккан эч ким жок. Мен бийлик атка минерлерин айтамын, алар үчүн эмне керек билейин деген бирөө жок. Алардын аракети «Бирдиктүү Орусия» эмнени каалайт ошону билүүдө», - дейт ал.

Ингушетиялык оппозиция лидерлеринин бири Магомед Хазбиев айтканга караганда жумуриятта ички абал курал алып кармашкыдай маанайда:

«Албетте, бул жерде (Ингушетияда - ММ) жарандык согуш жүрүп атат. Ар күнү андай кармаштан 5-7 кишиге чейин курман болот, а кээде 16 кишиге дейре өлүмгө учурашат, демек бул чыныгы согуш» - дейт Хазбиев мырза.
XS
SM
MD
LG