Бүгүн Ленин райондук соту Курулуш, архитектура агенттигинин мурдагы директору Ишенбай Кадырбековдун ишин кароону улантат. Бул күнү жактоочулар айыпталуучунун баш коргоо чарасын өзгөртүүнү соттон дагы бир ирет сураганы жатышат. Бул тууралуу жактоочу Ишен Айтманбетов “Азаттыкка” билдирди. Кадырбековго кызматынан аша чаап пайдаланды деген негиз менен каржы полициясы кылмыш ишин козгоп, апрелде камакка алган. Ленин райондук соту бул ишти ноябрдан бери карап, күбөлөрдү сурап жатат. Бул аралыкта Кадырбеков жана анын жактоочулары баш коргоо чарасын өзгөртүү сунушу менен сотко, президент Курманбек Бакиевге жана Эл аралык уюмдарга кайрылууларды жолдошкон. (BuS)
