Бул тууралуу мурдагы коргоо министри, “Бириккен элдик кыймылдын” саясий бюросунун мүчөсү Исмаил Исаков “Азаттыкка” билдирди. Анын айтымында, Башкы прокуратура кызматкерлери кечээ мурдагы коргоо министринин орун басары Борис Югайды суракка алышып, аны мурдагы коргоо министри Исмаил Исаковга каршы көрсөтмө берүүгө мажбурлашкан. Эскерте кетсек, Башкы прокуратура 12-январда Исмаил Исаковго карата дагы бир кылмыш ишин козгогон. Анда ал министрликке тиешелүү 500 чарчы метр жерди “Бишкеккурулуш” ишканасына 2 бөлмөлүү батирге алмашып, батирди уулуна алып берген деп айыпталат. (IJz)
