Иранда оппозиция лидерлеринин бири Мехди Карруби президенттик шайлоодон кийин митингге катышканы үчүн камакка алынгандардын айрымдарын түрмөдө кыйнап жатышканын билдирди. Интернет баракчасында жарыялаган билдирүүсүндө Карруби түрмөлөрдө айрым кыз-келиндер зордуктоого дуушар болорун айтты. Кечээ (9-августта) Иран полициясынын башкармалыгы түрмөдө айрым айыпкерлер кыйноолорго дуушар болуп жатканын мойнуна алган. 12-июнда президенттик шайлоодон кийин Тегеранда өткөн нааразылык акциялары маалында 2 миңге жакын киши камакка алынган.