АКШнын Мамлекеттик катчысы Хиллари Клинтон расмий Тегеранды дүйнөлүк лидерлер өзөктүк программа боюнча киргизген сунуштун негизинде тез арада кадам жасоого үндөдү. Кечээ Венадагы сүйлөшүүлөрдөн кийин, Бириккен улуттар уюмунун Атомдук энергия боюнча эл аралык агенттиги – МАГАТЭ келишимдин долбоорун Иранга, АКШга, Орусияга жана Францияга тапшырып, анын жума күнгө чейин жактырылышын суранган. Келишимге ылайык, Иран өзөктүк программасы үчүн уранды өзү байытпайт. Ал үчүн уран Орусияда жана Францияда байытылат.
