Армян президенти Серж Саркисян менен Азербайжан мамлекет башчысы Илхам Алиев бүгүн (22-ноябрда) Германиянын Мүнхен шаарында жолугушууда. Бул сүйлөшүүнүн алдында азери президенти Алиев: “Эгерде бул ирээт да сүйлөшүүдөн эч майнап чыкпаса, анда Азербайжанда Тоолуу Карабакты өзүнө күч менен болсо да» кайтарып алуудан башка арга калбастыгын эскерткен. Түркия менен Армениянын ортосундагы дипломатиялык жылыштар башталгандан бери, орто жолдо жикчил Тоолуу Карабак аймагы жана армян ээлигинде кала берип жаткан башка азери аймактары тууралуу Бакы менен Эревандын ортосунда эки тараптуу сүйлөшүү үчүн да жагымдуу шарт түзүлүшү мүмкүн деген жоромолдор айтылып келет.
