Ооган аскерлери талиптердин турагына кол салып, бир айдан бери туткунда жаткан Бириккен Улуттардын жергиликтүү өкүлдөрүн бошотуп алышты. Өлкөнүн түндүгүндөгү ооган аскерлеринин башчысы генерал Мурат Али Мураттын айтымында, Баглан дубанында бошотулган туткундардын абалы түзүк. Генералдын сөзү боюнча, операцияда эки ооган аскери менен катар «ондогон талиптер» окко учту. БУУнун Кабулдагы өкүлдөрү алардын кызматкерлери бошотулду деген кабарды тастыктады, бирок кошумча маалымат берген жок.
