Чалгын боюнча Улуттук мекеменин директору Деннис Блэр 28- майдан тарта кызматынан кетип жатканы жөнүндө президент Барак Обаманы кабардар кылганын билдирди. Бул тууралуу ал кечээ Обама менен жолуккан соң жарыялады, бирок кызматтан капыстан чегинүүсүнүн себебин атаган жок. Бирок бул окуя былтыр декабрда америкалык учакты жардыруу, ушул айдын башында Нью-Йоркто ишке ашпай калган жардыруу аракетинен соң АКШда чалгын мекемелеринин ишин иликтөө күчөгөн учурга туш келди. Чалгын боюнча Улуттук мекеме АКШда 2001- жылдын 11-сентябрындагы окуялардан кийин түзүлгөн жана ага 16 агенттиктин ишин координациялоо милдети жүктөлгөн.
