Жапониялык электрондук дөө шаалардын бири Сони дүйнөдөгү эң ийкемдүү чакан видеоэкран ойлоп тапканын жарыялады. Ал экранды кадимки карандашты тегерете ороп алсаңыз болот экен. Өтө жука сезгич материалдардан даярдалган бул экран келечекте ийилчеек телевизор, чөнтөккө салып алчу электрондук гезит-журналдар чыга баштаарын айгинелейт. Жаңы табылгасын Сони бейшембиде АКШнын Сиеттл шаарындагы көргөзмөгө алып чыгат.
