11-сентябрда мусулмандардын ыйык китеби Куранды өрттөөгө камынган жана аны маалымат каражттары аркылуу дүйнө жүзүнө жар салган элүүдөй киши кирип-чыккан Флорида штатындагы евангелисттик чиркөө башчысы Терри Жонс пландаган иш аракетинен убактылуу кайтты. АКШ президенти баш болгон Вашингтондун өкүлдөрү, Ооганстандагы эл аралык коалиция башчысы генерал Петреус Жонстун демилгесин айыпташса, дүйнөнүн мусулман өлкөлөрүндө кайрадан АКШга каршы нааразылыкты, жек көрүүнү туудурду.
