Миң жылдыктын мындан он жыл мурда кабыл алынган программасында белгиленген өнүгүү максаттарын, анын ичинде жакырчылыкты кыскартуу боюнча милдеттердин аткарылышын талкуулого арналган саммитке дүйнөнүн 140тан ашуун өлкөсүнөн мамлекет жана өкмөт башчылар катышууда. Ири мамлекеттерден бүгүн саммитте АКШ президенти Барак Обама, кытай өкмөт башчысы Вэнь Цзябао сөз сүйлөйт. Ал эми немец канцлери Ангела Меркел кечээги сөзүндө жакыр мамлекеттер жардамга эле таяна бербестен, өнүгүүсү үчүн жоопкерчиликти өздөрү алуусу керектигин белгиледи. Иран президенти Махмуд Ахмадинежад болсо капитализм кыйроонун босогосунда тургандыгына токтолуп, жаңы экономикалык система түзүүгө мезгил келгендигин айтты.
