Өлкөнүн тышкы иштер министрлиги таркаткан билдирүүдө Тегерандын дүйнөлүк "алтылык" менен сүйлөшүүлөрүндө да өзгөрүүлөр болбой турганы айтылат. Кечээ иран президенти Махмуд Ахмединежад тышкы иштер министри Манучехр Мотаккини кызматтан алып, анын ордуна убактылуу мөөнөткө Али Акбар Салехини дайындаган эле. Бүгүнкү билдирүүдө мындай чечимдин себептери айтылбайт. Салехи буга чейин өлкөнүн атом өнөр жай мекемесин башкарып келген.
